Phili 4 | JAE | STEP | O ŋoc lasitêwaac, aê têtac gêwiŋ to gajam aoc su amac, gebe amac tec agôm aê têtac ŋajam ma atu aêŋoc gêlôŋ. O lauace, amboac tonaŋ akô ŋajaŋa, gebe Apômtau gêbiŋ amac tôŋgac.

Philippians 4

1 O ŋoc lasitêwaac, aê têtac gêwiŋ to gajam aoc su amac, gebe amac tec agôm aê têtac ŋajam ma atu aêŋoc gêlôŋ. O lauace, amboac tonaŋ akô ŋajaŋa, gebe Apômtau gêbiŋ amac tôŋgac.

Paulu gêlêŋ biŋ lau

2 Aê jalêŋ biŋ awêlagêc Ewodia agêc Suntuku gebe sêmoa têntac tageŋ êtu Apômtauŋa. 3 Ma aê gabe jateŋ aôm, ŋoc ŋac, taŋ gôjam kôm ŋaŋêŋgeŋ gôwiŋ aê naŋ, gebe ônam awêlagêc tonaŋ sa, gebe êsêagêc sêjam kôm ŋawae ŋajamŋa sêwiŋ aê têtôm Klemen to lau-sêjam-kôm-sêwiŋ-aêwaga ŋagêdo, naŋ nêŋ ŋaê gêc buku mateŋ jaliŋa.

4 Têmtac ŋajam ŋapaŋ gebe Apômtau gêbiŋ amac tôŋ, ma jasôm êtiam gebe Têmtac ŋajam. 5 Aŋgôm nêm gêŋ totêmtac wapôm êwa amac sa êndêŋ ŋamalac samob. Apômtau kêdabiŋgac. 6 Apô sim taôm atom. Gêŋ teŋ embe êŋgôm amac, naŋ ateŋ to ataŋ êndêŋ Anôtô todaŋgegeŋ. 7 Ma Anôtônê biŋmalô, taŋ ŋam kêlêlêc kauc to kauc nomŋa samob su naŋ, ênsôb nêm ŋalêlôm to biŋ, taŋ taêm gêjam naŋ, samob sa êkanôŋ Kilisi Jesu.

8 O lasitêwaac, aê jasôm biŋ teŋ êwiŋ acgom gebe Biŋŋanô to biŋ mansaŋ ma biŋ gêdêŋ to biŋ ŋawa ma biŋ taŋô ŋajamŋa to biŋ ŋapep ma biŋ ŋaŋêŋ to piŋ wae ŋajamŋa teŋ, biŋ samob tonaŋ ŋai taêm ênam êtu tôŋ amac. 9 Biŋ taŋ kadôŋ to kakêŋ gêdêŋ amac ma biŋ, taŋ aŋô to alic aê gagôm naŋ, aŋgôm amboac tonaŋ. Ma biŋmalô ŋatau Anôtô oc êwiŋ amac.

Paulu gêjam daŋge kêtu sêkêŋ geŋ sêjam eŋ saŋa

10 Apômtau kêkêŋ aê têtac ŋajam kêsa samucgeŋ gebe amac amoa ec ŋêŋgeŋ e galoc ôlim palê kêsa kêtiam gebe anam aê sa. Amac abe anam aê sa, mago ŋalêŋ masi. 11 Aê kasôm biŋ tonaŋ kêtu kapô lêna gêŋŋa atom. Aê kadôŋ tauc gebe geŋ ŋagec-ŋagec, taŋ jatap sa naŋ, kêtôm aê. 12 Aê kajala tapô lêna gêŋŋa. Aê kajala daŋgôŋ moasu ŋaôŋa. Aê kajala gêŋ samob tonaŋ kêtu tôŋ tomalageŋ. Ŋasawa teŋ aê gaeŋ gêŋ e gêôc aê tôŋ, ma ŋasawa teŋ mo gêjô aê. Ŋasawa teŋ aê katap ŋoc gêŋ taêsam sa, ma ŋasawa teŋ kapô lêna gêŋ. 13 Aê katôm gêŋ samob tonaŋ ŋai kêtu Kilisi, taŋ kêpuc aê tôŋ naŋŋa.

14 Ma amac agôm ŋajam gebe aôc ŋoc gêŋwapac awiŋ. 15 Amac lau Pilipi taôm ajalagêc gebe gêdêŋ taŋ gawa ŋawae ŋajam sa kêtu ŋamata ma gawi Makedonia siŋ naŋ, gôlôac dabuŋ teŋ sêpuc aê tôŋ ma aêac akêŋ gêŋ teŋ gêjô tau atom, amac taômgeŋ. 16 Gêdêŋ taŋ gamoa Tesaloniki naŋ, amac ajam aê sa ma asakiŋ gêŋ kêtu dim luagêc. 17 Aê taêc kêka gebe akêŋ gêŋ êndêŋ aêŋa nec atom, masi, aê taêc kêka amac gebe anam ŋanô êlêlêc su e êmoasiŋ amac. 18 Gêŋ samob, taŋ akêŋ naŋ, kêtap aê sa su ma gêŋ tau kêlêlêc aê su. Gêŋ taŋ Epaproditi kêkôc aŋga amacnêm gêmêŋ naŋ, mêŋkêlêsuc aêgeŋ. Gêŋ tonaŋ kêtôm ŋamalu ŋajam to da mansaŋ, taŋ Anôtô gêlic gêjac mataanô ŋajamanô naŋ. 19 Ŋoc Anôtô, taŋ kêkêŋ Kilisi Jesu gêbiŋ amac tôŋ naŋ, kêtu gêŋ tolêlôm-tolêlôm ŋatau toŋawasi. Eŋ oc êkêŋ gêŋ, taŋ apô lêna naŋ, êlêsuc êmacgeŋ. 20 Ŋawasi êndêŋ aêac Tameŋi Anôtô totêm-totêm. Biŋŋanô.

Paulu gêjac mata nê biŋ

21 Aê aoc gêjac Anôtônê lau samob, taŋ Kilisi Jesu gêbiŋ aêac tôŋ naŋ. Lasitêwai taŋ sêmoa sêwiŋ aê naŋ, aweŋ gêjac amac. 22 Anôtônê lau samob aweŋ gêjac amac, ma êsêac, taŋ aŋga kaisaranê anduŋa naŋ, taêŋ gêjam amac ŋanô.

23 Apômtau Jesu Kilisi nê moasiŋ êwiŋ amacnêm ŋalau.